Аналитика на лекови 2-скрипта

Денес, модерните фармацевтски анализи повлекуваат многу повеќе отколку анализа само на активните фармацевтски супстанции или формулираниот производ. Постојат многу причини за оваа промена, меѓу кои и способноста да се разберат физичко-хемиските својства на фармацевтските соединенија, преку употреба на современи инструментални методи. Понатаму, постои потреба за обезбедување на квалитет на фармацевтските производи во текот на нивниот рок на употреба. Ова бара да ги проучуваме интеракциите на активната супстанција со ексципиенсите во присуство на резидуални растворувачи, како и други потенцијални реакции на деградација што можат да се појават во формулираниот производ во одреден временски период под различни стресни состојби. Фармацевтската индустрија е под зголемена контрола од регулаторните органи и групите од јавен интерес, со фокус кон тоа да доследно се испорачуваат на пазарот безбедни, ефикасни производи, кои ги исполнуваат и задоволуваат критериумите за квалитет. Како дел од раскрсницата да се одржи линијата на цените на лековите на рецепт, индустријата пристапи кон рационализирање на своите операции во однос на откривањето, развојот на лековите и секако, нивното производство. Напорот да се донесат иновативни производи побрзо на пазарот без негативно влијание врз квалитетот или безбедноста е предизвик на секоја компанија да ги модернизира постоечките процеси и да бара начини за зголемување на капацитетот, но за пократок временски период, следејќи ја изреката „направете повеќе со помалку“.
Аналитичката хемија одигра голема улога во промените со кои се соочува фармацевтската индустрија денес. Традиционално се гледало како на услужна дејност, но аналитичкиот оддел станува значаен партнер во процесот на развојот на лековите. Дополнително, важно е да се напомене дека генерирањето и собирањето на аналитичките податоци стана критична активност при изборот на кандидатски молекули за понатамошен развој. Работата под услови кога има ограничување со примероци, а од друга страна, во целосна согласност со тековните добри производствени практики (cGMP), наметнува фармацевтските аналитичари да генерираат точни и прецизни податоци. Науката и технологијата што се користат денес, заедно со новите прописи кои сега се обврзувачки, направија фармацевтските анализи да бидат многу посложени во споредба со она што беше тренд пред десет години.
Содржината на оваа скрипта ја исполнува потребата за учебно помагало што е во однос на филозофијата за аналитиката на лекови, поддршка за развојот на лековите, како и пост-маркетиншка поддршка. Целта е да се претстави улогата и делувањето на аналитичкото истражување и развој како дел од севкупниот процес на развој на нови лекови. Поради оваа причина, поглавјата се организирани повеќе на начин управуван од процеси, а не од чиста функција или техника. Во сите случаи, обезбедени се голем број референци за оние читатели кои сакаат подлабока дискусија за одредена тема. Фармацевтскиот аналитичар игра голема улога во обезбедувањето на идентитет, безбедност, ефикасност, чистота и квалитет на лекот. Студиите за безбедност и ефикасност бараат активната супстанција и готовиот производ да ги исполнуваат утврдените барања за идентитет и чистота, односно за биорасположливост (Поглавје 1). Потребата за изведба на фармацевтските анализи во голема мера е поттикната од регулаторните барања. Ова произлегува од фактот дека регулаторните размислувања се наѕираат кога се рекламира производот што не го исполнува својот квалитет. Регулаторните барања и прашањата за усогласеноста се детално дискутирани во оваа скрипта. Претставена е значајна дискусија за насоките што ги приложува Меѓународната конференција за хармонизација (ICH), која континуирано се обидува да ги усогласи регулаторните органи во САД, Европа и Јапонија.
Процесите за откривање на нови лекови и оптимизацијата на кандидат-молекула во фармацевтската индустрија интензивно се спроведуваат со примена на комбинаторната хемија во комбинација со high-throughput скринингот (HTS) (Поглавје 2). Процесот на селекција вклучува идентификација на онечистувања и производи поврзани со процесот и проучување на механизмите на деградација уште во раната фаза од развојот на лекот. Ова обезбедува доволно време за подобрување на синтезата на активната супстанција, како и спречување на појавата на вакви онечистувања и производи на деградација во формулацијата (Поглавје 3). Исто така, во последно време сѐ поголем степен на внимание се посветува на физичките својства на цврстите материи, кои можат да влијаат на перформансите на дозираната форма (Поглавје 4). Доброто разбирање на физичко-хемиското однесување на фармацевтските цврсти материи обезбедува подобар избор на формулација. Студиите на предформулирање, кои се обработени во Поглавје 5, се спроведуваат за да се обезбедат податоци и информации за активната супстанција и технологијата на производство пред почетокот на развој на формулацијата, како и активности при дизајнирање на лекови. Понатаму, се дискутира за процесот на развој на аналитичките методи, што е опфатено во Поглавје 6, со акцент на правилното поставување на критериумите за соодветност на систем. Следствено на тоа, валидацијата на методите е детално разработена во Поглавје 7. Успешен трансфер на аналитичката методологија за нов производ во голема мера зависи од поседувањето вистински процес; ова е нашироко дискутирано во Поглавје 8. Правните барања за стабилност се насочени кон обезбедување дека готовиот производ останува непроменет во рамките на утврдените спецификации за готов производ, со цел да се обезбеди неговиот идентитет, јачина, квалитет и чистота. Затоа, неопходно е да се спроведат студии за стабилност за да се предвиди, процени и осигура безбедноста на готовите производи (Поглавје 9). Тенденција на новите регулаторни директиви е да се наметнат вклучување на математички и статистички методи, како научни пристапи за интерпретација на резултатите од in vitro профилите на растворливост на цврстите дозирани форми (Taylor & Cihon, 2004). Од особено значење е академијата, индустријата и регулаторните органи да работат токму во оваа насока, имајќи предвид дека мултиваријантните статистички методи упатуваат кон подобро предвидување на in vivo перформансите на испитуваната формулација и воспоставување in vitro – in vivo (IVIVC) корелација (Поглавје 10).
Вредните информации презентирани во оваа скрипта ќе бидат корисни за оние кои се вклучени во различни аспекти на фармацевтската индустрија при развој на нови лекови, производство, контрола, наставна дејност или регулатива.