Римска вила на локалитетот Дрма – Бадар. Архитектура и градежни материјали

Развојот на римската архитектура се должи на инвентивноста во поглед на конструктивните елементи и градежните материјали кои ги користеле римјаните во нивната градителска традиција. Концептот на римската вила произлегува од римскиот домус како објект за индивидуално живеење на високата класа, којшто се префрла на помирни локации на маргините на градот во субурбиумот или во руралните средини во вид на рустикални вили.
Римската вила на локалитетот Дрма – Бадар кај с. Бадар претставува еден од порепрезентативните архитектонски објекти од овој тип во Скопската Котлина. И покрај тоа што не е целосно истражена и сè уште не е утврден нејзиниот габарит, досега истражените сегменти, на двата истражувачки сектори, укажуваат на мошне солидно ѕидана архитектура со цврсти и дебели ѕидови до 70 см. ѕидани од камен и тули врзани со малтер. Тулите можат да се следат во три различни димензии, ѕидани без некој посебен шаблон. Најрепрезентативен дел од градбата е апсидалната просторија во функција на триклиниум со под од хидростатен малтер, која се протега на површина од околу 150 квадратни метри, која воедно претставува најголема просторија во рамките на досега истражениот простор. Она што го сместува овој објект меѓу порепрезентативните покрај Стакина Чешма – Валандово и Римската вила во Скупи е фактот што истата во рамките на внатрешната декорација имала ѕидни и плафонски фрески. Во непосредна близина на триклиниумот во правец на југ се наоѓа уште еден објект чиишто елементи упатуваат на можноста дека бил интегрален дел од целата вила во функција на бања. Густата концентрација на градежни елементи на еден поширок простор далеку поголем од габаритот на градбата остава простор за дилема во смисла на нејзината идентификација како вила рустика или субурбана.