Инциденца на акутен миокарден инфаркт со СТ-сегмент елевација и важноста на сестринска нега пред и после перкутана коронарна интервенција

Резиме: Кардиоваскуларните заболувања (КБЗ) се водечка причина за смрт во светот, а коронарната срцева болест е причина за речиси половина од смртните случаи од КБЗ. Перкутаната коронарна интервенција е нехируршка, инвазивна процедура што се користи за подобрување на протокот на крв во исхемичното ткиво и олеснување на стеснувањето или оклузијата на коронарната артерија предизвикана од компликации на коронарна срцева болест, вклучувајќи го и акутен миокарден инфаркт со СТ сегмент елевација (СТЕМИ). Американскиот колеџ за кардиологија и Американската асоцијација за срце препорачуваат сите подобни пациенти со СТЕМИ кои имале симптоми во претходните 12 часа да добијат реперфузиона терапија, а примарната ПЦИ е препорачаниот метод на реперфузија кога може да се изврши навремено (идеалното време од врата до балон не треба да надминува 90 минути).
Цел: Цел на овој труд е да се прикаже инциденцата на акутен миокарден инфаркт и третманот кај пациенти хоспитализирани во ЈЗУ УК Клиника за Кардиологија - Скопје, во период од три години.
Материјали и методи: Студијата беше спроведена во ЈЗУ УК Клиника за Кардиологија - Скопје. Во студијата се вклучени пациенти хоспитализирани со дијагноза СТЕМИ и начинот на добиениот третман.
Резултати: Вкупен број на изведени перкутани коронарни интервенции, во период од 2022 до 2024 година, на клиниката изнесува 14.158. Од вкупниот број на пациенти, 9.490 (67%) биле од машки пол, а 4.668 (33%) од женски пол. Од вкупниот број на изведени коронарни интервенции, 2.140 (15,1%) биле примарни ПКИ кај пациенти со СТЕМИ.
Заклучок: Ургентните состојби како што е акутниот миокарден инфаркт, настанува изненадно, без предупредување и кај пациенти кој предходно не биле лекувани од срцеви заболувања и нивниот третман опфаќа изведување на перкутани коронарни интервенции. За превенција и нега на пациентите исклучиво е важна квалитетна здравствена установа, опременост и стручност на здравствените работници, но и сестринската нега на акутно загрозените пациенти пред и после изведената интервенција.
Клучни зборови: акутен миокарден инфаркт, перкутана коронарна интервенција, инциденца, третман, сестринска нега