Правописот во електронската комуникација со студентите

Тема на истражување по овој повод ќе биде анализа на правописните грешки и пропусти направени од страна на специфична социјална група – студентите при комуникација со предметниот професор. Оваа анализа, пред сè, треба да покаже дали и колку студентите внимаваат на правописните правила наложени од нормативниот стандарден јазик при електронскиот контакт со своите професори. Токму испратените електронски пораки од страна на студентите ќе бидат материјал за анализа, а овие пораки главно се однесуваат за наставниот предмет што професорот им го предава. Познато е дека содржината на пораките, главно, се состои од добивање дополнителни информации за предметот така што овие пораки најчесто ќе претставуваат поставување директни прашања кон професорот, кои многу често не се поставени во формална, учтива форма.