Пештера Будимирица, Кавадаречко: Сондажно ископување 2024

Пештерата Будимирица е лоцирана во клисурата на Каменичка Река, КО Кошани, Кавадарци. Пештерата била одамна позната на локалното население, а првиот спелеолошки опис е објавен во 1971 година. Во непознат момент во 20 век пештерата била посетена од диви копачи при што отворена била голема јама од околу 5 х 1,5 метри. Поинтензивни спелеолошки и
геоморфолошки истражувања беа спроведени во 2012/13 година кои резултираа со подетални сознанија за еволуцијата на пештерата во овој карстен предел (Temovski et al., 2016). При овие истражувања изведено беше и радиокарбон датирање на животинска коска извадена од блок бреча, видлив во профилот од диво ископаната јама, со дата од околу 40000 години. Сондажните ископувања во 2024 година беа спроведени со цел
идентификување на потенцијални палеолитски остатоци. Отворена беше една сонда непосредно до јамата и исчистени беа профилите во јамата.
Идентификувани се неколку слоја од кои некои содржат археолошки материјал како коски, јагленчиња и доцноантичка керамика.
Беше идентификуван и блокот бреча од кој потекнува коската со старост од околу 40 000 години, при што пронајдени беа и други патинирани животински коски. Слојот под бречата содржи доцноантичка керамика и бројни патинирани стари коски еродирани од бречата. Документираната ситуација повторно ја потврдува комплексноста на формациските процеси во пештерите, кои значително се разликуваат меѓу различни пештери. Во рамки на истражувањата прибрани беа и примероци јагленчиња, коски и карпи за радиометриски датирања со цел потемелно разбирање на хронологијата на развојот на погорните седименти.