Фестивалите за изворен фолклор - чувари на старата музичка и играорна традиција

Фестивалите за изворен фолклор како сцена на која се презентираат музички вокални, инструментални и играорни содржини се местото каде поширокиот аудиториум има можност да се запознае со постарата традиција на различните етнички групи кои живеат на територијата на денешна Р.С. Македонија. На овие фестивали можат да се проследат играорни и музички содржини презентирани на народни музички инструменти како и песни испеани од носителите на вокалната традиција.
Со непосредното присуство на некој од фестивалите секој присутен гледач може непосредно да ги доживее и почуствува старите обичаи, игри, песни, ора и инструменти. Самите фестивали претставуват и своевиден терен за истражувачите на овој сегмент од фолклорното творештво во време кога речиси е невозможно да се сретнат овие фолклорни содржини во регионите каде настанале и се практикувале.
Од денешен аспект, ако до одреден момент музичкото културно наследство требаше да се заштити од негово губење или исчезнување, следната фаза е заштитување на фестивалите на кои може да се проследат овие културни наследства кои сѐ поретко можат да се видат во својата природна средина.
Клучни зборови: фестивали, песни, инструменти, ора, обичаи.