Структурни модификации - самостојна изложба

Проектот насловен „Структурна модификација“ всушност прeтставува моја самостојна изложба на десет скулптури од галериски формат, кои многу добро енергетски се вклопија во галерискиот простор на Прима Центар-Берлин.
Основата на интерес на овој проект-изложба гравитира околу можноста за совладувањето на суштината и специфичноста на употребениот материјал во техниката на изработка или градење на дадените дела. Нивната изработка во природни материјали, како што се конопот, кучината и дрвените струготини, кои ни се блиски во секојдневието, но исто така се невообичаени за употреба во изработка на скулптурата како медиум, нудат поттикнувачка искра која ја активира фантазијата во самиот процес на обликувањето, што остава простор и можност за инстинктивно реагирање во текот на творечкиот процес. Притоа односот на масите се димензионираше преку врзувачки фактори, како збир на алтернативи во оформување на целината. Поради тоа во делата се присутни ефекти на просторно визуелна тензија или сугестија на една своевидна возбудлива пореметеност.