Работилница за стакло во Баргала

Доцноантичкиот град Баргала е сместен во пазувите на планината Плачковица, на левиот брег на реката Брегалница, на речиси еднакво растојание меѓу современите градови Штип и Кочани. Неговата потесна локација е десниот брег на Козјачка Река, кај село Горен Козјак.
Баргала е засега единствениот убициран град по течението на реката Брегалница, иако според античките извори на овие простори се споменуваат повеќе антички градови (Папазоглу 1957: 244–248). Поголем број истражувачи спроведуваа систематски теренски и кабинетски истражувања во изминатите шест децении (Михайлов 1946; Венедиков 1948; Грујиќ 1955; Папазоглу 1957; Алексова 1967; Белдедовски 2005; Нацев, Фрков 2009; Нацев 2011; Атанасова, Нацев 2019). Просторот во вкупна површина од 4,7 ха. е затворен со фортификација ориентирана североисток – југозапад во трапезоидна форма. Според епиграфскиот запис, сочуван на еден камен блок, откриен во месноста Ханче, главната градска порта на градот Баргала била изградена во 371 година, што ја дава горната граница за изградба на утврдувањето и на заштитниот бедем (Нацев 2008: 15).