Некропола во подножјето на археолошкиот локалитет Цареви Кули - Струмица

Во подножјето на археолошкиот локалитет тврдината ,,Цареви Кули“, пред една деценија започнаа археолошки истражувања на еднокорабна средновековна црква. Сакралниот локалитете е лоциран на околу 200 метри североисточно од фортификацијата. Црквата претставува дел од урбаното јадро на средновековна Струмица, изградена покрај една од комуникациите кои воделе до тврдината “Цареви Кули”.
Со археолошките истражувања во изминативе години покрај откривањето на црквата се истражени и документирани 35 погребувања, од различни периоди, почнувајќи од доцниот среден век (XIII-XIV век) кога опстојувала црквата, турското средновековие (XV-XVIII век), па сѐ до првите децении на XX век.
Со тоа се потврдува, дека овој дел од градот Струмица, до блиско минато, бил дел од духовната колективна меморија на локалното население кое било погребувано на овој простор во континуитет од XIII до XX век. Во трудот ќе бидат презентирани, резултати од археолошките истражувања на некрополата, изведени во 2015, 2016, 2021 и 2022 година.