Неолитизација и развој на неолитните култури во Кочанската котлина

Во текот на 2014 година е планирана реализација на првата фаза од проектот „Неолитизација и развој на неолитните култури во Кочанската котлина‟. Проектот ќе започне од северната граница на котлината, поточно на ниските ридови од каде што кон Север и Североисток започнуваат Осоговските Планини. Овде, во атарот на селата Нивичани и Бели, се наоѓаат два локалитети регистрирани во Археолошката карта на Р. Македонија, кои, меѓу другото, содржат остатоци и од Неолитот.
Годинава се планирани сондажни археолошки истражувања на овие два локалитети, како и екстензивно рекогносцирање на останатиот дел на Кочанската котлина. Преку сондажните истражувања ќе биде утврдена вертикалната стратиграфија и подетална хронолошка припадност на овие два локалитети. Рекогносцирањата ќе се вршат со цел откривање и регистрирање на нови локалитети од Неолитот, собирање на површински материјал, со што би се добила поцелосна слика за вистинската концентрација на населението во оваа котлина, во различните фази на Неолитот.