Од Штип до Мадрид: студентите на Технолошко-технички факултет блеснаа на меѓународната модна ревија EMERGE 2026

На 4 јуни 2026 година, студентите од Технолошко-техничкиот факултет при Универзитетот „Гоце Делчев“ – Штип, под менторство на вонр. проф. д-р Сања Ристески, учествуваа на XIV издание на меѓународната модна ревија EMERGE во Музејот на костимот (Museo del Traje) во Мадрид, Шпанија. Учеството беше реализирано во рамките на Erasmus+ Blended Intensive Programme (BIP) на алијансата ACE²-EU, во соработка со Универзитетот „Francisco de Vitoria“ и други европски универзитети.

Темата „Mythology of Wine“ („Митологија на виното“) ги поврза модниот дизајн, митологијата и културното наследство. Претставените креации ја истражуваат двојствената природа на Дионис преку контрастот меѓу заштитата и слободата. Скулптуралните горни делови, обликувани како симболичен оклоп, изразуваат сила, стабилност и структура, додека флуидните долни делови внесуваат движење, леснотија и сензуалност.

Колекцијата е резултат на истражувачки и креативен процес во кој митолошката симболика се преточува во современ моден израз. Настанот овозможи интеркултурна и интердисциплинарна размена, обединувајќи ги образованието, дизајнот и уметничкото творештво.