Меѓународни, европски и национални правни режими за миграција и азил

Публикацијата „Меѓународни, европски и национални правни режими за миграција и азил“ претставува збирка од осум научни трудови на десет домашни и странски автори, посветени на современите предизвици во областа на бегалското право, миграцијата и азилот. Нејзината основна цел е да ја збогати научната и стручната литература на македонски јазик и да овозможи систематизиран пристап до релевантни истражувања од меѓународна, европска и национална перспектива.

Трудовите обработуваат прашања поврзани со миграциските политики на Европската Унија, управувањето со нерегуларната миграција, спасувањето мигранти на море, забраната за колективно протерување, заштитата од трговија со луѓе и трудова експлоатација, судската практика на Европскиот суд за човекови права, како и правната терминологија и политичките аспекти на азилот. Посебно внимание е посветено на Северна Македонија и предизвиците во примената на меѓународните и европските стандарди.

Публикацијата е резултат и на повеќегодишната академска и институционална соработка на Универзитетот „Гоце Делчев“ – Штип со УНХЦР, како и на заедничките истражувачки заложби на домашни и меѓународни научници. Нејзината научна и општествена вредност се состои во унапредувањето на знаењето, поттикнувањето на академската дебата и афирмирањето на пристап кон миграцијата и азилот заснован врз човековите права, солидарноста и владеењето на правото.