Одржливост на политиките за миграција и азил на Европската Унија

Трудот ја анализира одржливоста на политиките за миграција и азил на Европската Унија низ призмата на Целите за одржлив развој на Обединетите нации, со посебен акцент на заштитата на човековите права, принципот на невраќање и надворешната димензија на европската миграциска политика. Поконкретно, се разгледува поврзаноста на миграцијата и азилот со целите што се однесуваат на намалување на сиромаштијата, квалитетното образование, достоинственото вработување, намалувањето на нееднаквостите и изградбата на мирни и инклузивни општества. Посебно внимание е посветено на договорите за реадмисија меѓу Европската Унија и земјите од Западен Балкан и на предизвиците што произлегуваат од враќањето на државјани на трети земји во услови на недоволно развиени правни и институционални механизми за нивна понатамошна репатријација. Анализата ги опфаќа и финансиските и институционалните аспекти на политиката на враќање, како и прашањата поврзани со почитувањето на основните права на мигрантите и барателите на азил. Дополнително се разгледува практиката на екстернализација на постапките за азил, со посебен осврт на италијанските центри за обработка на барања за азил во Албанија. Трудот заклучува дека актуелниот систем останува претежно реактивен и ориентиран кон пренесување на одговорноста кон трети и транзитни земји, поради што е неопходна ревизија на европското законодавство, механизмите за солидарност и поделба на одговорноста, како и практиките на враќање и екстернализација, со цел да се обезбеди поголема усогласеност со меѓународното право, човековите права и целите на одржливиот развој.