Интегриран третман и здравствена нега кај пациенти со акутен коронарен синдром и дијабетес мелитус тип 2

Акутниот коронарен синдром (АКС) претставува една од првите причини за морбидитет и морталитет на глобално ниво, а неговата зачестеност е значително зголемена кај пациенти со дијабетес мелитус тип 2 (ДМ тип 2). Дијабетесот како хронично метаболно заболување придонесува за забрзана атеросклероза, ендотелна дисфункција и зголемен ризик од кардиоваскуларни компликации, што го прави третманот на овие пациенти покомплексен и специфичен. Современите терапевтски пристапи бараат интегриран и мултидисциплинарен модел на третман кој ги обединува кардиолошките, ендокринолошките и сестринските интервенции.
Цел: Трудот има за цел да го покаже значењето на интегрираниот пристап во третманот и здравствената нега кај пациенти со АКС и ДМ тип 2.
Материјали и методи: Трудот е ретроспективна анализа на пациенти хоспитализирани со акутен коронарен синдром и ДМ тип 2 на оддел кардиологија во Клиничка болница Штип, за период од една година.Резултати: Во 2025 година, на одделот за кардиологија во Клиничка болница Штип, се хоспитализирани и лекувани вкупно 353 пациенти со дијагноза за АКС. Најголем број (56,66%), се со СТЕМИ, потоа 39,66% со дијагноза нестабилна ангина пекторис и само 3,70% со НОН-СТЕМИ. Од вкупниот број пациенти со АКС, со дијагностициран ДМ тип 2 биле 130 (36,83%). Во тек на хоспитализацијата 16 (4,5%) пациенти, од вкупниот број на АКС, биле со новооткриен ДМ тип 2.
Заклучок: Интегрираниот третман и здравствената нега кај пациенти со акутен коронарен синдром и дијабетес мелитус тип 2 претставуваат клучен фактор за подобрување на клиничките исходи и намалување на морталитетот. Комбинацијата на кардиолошка и ендокринолошка терапија, заедно со континуирана и индивидуализирана сестринска грижа, овозможува поефикасна контрола на болеста и превенција на компликации.
Клучни зборови: акутен коронарен синдром, дијабетес мелитус, здравствена нега