Вивчаємо македонську: рівень А1 та А2 / Учиме македонски: ниво А1 и А2

Учебникот „Вивчаємо македонську / Учиме македонски“ е наменет за украински говорители што го изучуваат македонскиот јазик на почетните нивоа А1 и А2. Неговата основна цел е усвојување на јазичните знаења потребни за практична комуникација во различни секојдневни ситуации. Учебникот содржи 28 лекции во кои постепено се воведуваат и разработуваат лексички и граматички содржини, организирани околу теми како запознавање, семејство, секојдневие, домување, образование, храна, патување, здравје, културен живот, природа и спорт. Граматичкиот материјал ги опфаќа основните категории и структури на современиот македонски јазик, приспособени на потребите на украинските изучувачи.
Наставниот материјал е дополнет со дијалози, вежби и текстови за читање и преведување. На крајот се вклучени македонско-украински диференцијално-фреквентен речник и украинско-македонски речник со околу 1.400 најпотребни и најфреквентни лексички единици. Учебникот е создаден врз основа на практично искуство во наставата по македонски јазик на Универзитетот во Лавов „Иван Франко“, а значителен дел од материјалите претходно биле применувани во работата со студенти.