Пресудата АА и други против Македонија: од очигледното до неочекуваното

Мигрантската криза од 2015 година претставуваше сериозен хуманитарен, политички и правен предизвик за Европа и земјите од Балканот, вклучително и Република Северна Македонија, која се најде на една од главните транзитни рути кон Западна Европа. Масовниот прилив на мигранти и бегалци ги стави на тест националните механизми за заштита на човековите права и усогласеноста на практиките со меѓународните стандарди, особено во однос на забраната за нечовечко и деградирачко постапување, колективното протерување и правото на ефективен правен лек. Во фокусот на трудот е предметот *A.A. and Others v. North Macedonia* пред Европскиот суд за човекови права, кој отвори значајни прашања во однос на примената на член 4 од Протоколот бр. 4 и член 13 од Европската конвенција за човекови права во контекст на мигрантската криза. Преку анализа на предметот и неговото пошироко правно значење, трудот го проблематизира пристапот на Судот кон гаранциите предвидени со Конвенцијата во услови на масовни миграциски движења и го поставува прашањето дали исклучоците создадени во кризни околности можат постепено да прераснат во правила во идната судска практика.