Важноста на менталното здравје каj студентите: Постои ли здравје без ментално здравјe?

Вовед: Менталното здравје на студентите во нашата држава претставува камен-темелник за успешен академски пат и општа ментална благосостоба.Способноста на студентите да се запознаат со поврзаноста на менталното здравје и академскиот живот, како и разбирањето и негувањето на истото, е
од фундаментално значење за образовниот процес.
Цел: Да се прикажат актуелните предизвици и потреби на студентите поврзани со менталното здравје на Универзтитет „Гоце Делчев" - Штип.
Материали и методи: Анкетен прашалник реализиран преку Е-пошта во месец ноември 2023 година, опфатени се 663 студенти од сите факултети на Универзитетот.
Резултати: Истражувањето покажа дека 638 (95.8%) од студентите го сметаат менталното здравје за важен дел од Универзитетската заедница, но 423 (63.5%) од нив изразуваат загриженост за неотвореноста на студентите кон дискусии поврзани со ментално здравје. Значајни се добиените одговори на студентите за она што некогаш го почувствувале во текот на академскиот живот. Така, 571 (85.7%) некогаш се почувствувале анксиозно,515 (77.3%) депресивно, и 623 (93.5%) тензично. Притоа, 520 (78.1%) приметиле намалена концентрација, 63 (9.5%) се соочиле со злоупотреба на супстанции, и 563 (84.5%) приметиле главоболка и губење на апетит поврзани со академскиот стрес. Загрижувачки е дека 409 (61.4%) никогаш не се консултирале со стручно лице, 136 (20.4%) се почувствувале изолирано, а 393 (59%) сметаат дека свесноста на професорите за менталното здравје на студентите е мала.
Заклучок: Потребни се конкретни стратегии за справување и системска поддршка, универзитетски прирачник за поддршка на студентското ментално здравје и активно универзитетско психолошко советувалиште.Сепак, не постои здравје без ментално здравје.
Клучни зборови: Ментално здравје, академски живот, системска поддршка