Преглед и аналитичка рефлексија за проектот: „Современи пристапи во истражувањето на интеркултурната прагматика и нејзина примена во наставата – од научни концепти до практична реализација“

Современата настава по странски јазици сè повеќе ја нагласува
потребата од интегрирање на интеркултурната прагматичка компетенција
кај изучувачите по странски јазици како клучен сегмент во образовниот
процес. Прагматиката, како дисциплина што го проучува јазикот во конкретен
комуникациски контекст, овозможува увид во начинот на кој говорителите од
различни култури ја изразуваат својата намера на културолошки соодветен
и прифатлив начин. Овој проект ги истражува современите пристапи во
интеркултурната прагматика и нивната практична примена во наставата по
германски и англиски јазик како странски јазици, во споредба со македонскиот јазик
и говорните модели на изворните говорители. Истражувањата се фокусираат на
влијанието на културните разлики врз комуникациските стратегии, феноменот на
учтивост и интерпретацијата на говорните чинови во меѓујазичната комуникација.
Применети се теоретски рамки од социопрагматиката, културолошката и
антрополошката анализа на комуникацијата, како и контрастивната прагматика.
Емпириските податоци опфаќаат корпус од автентични дискурси, со цел
идентификација на културно специфични модели и развој на наставни стратегии
за зголемување на прагматичката свесност кај изучувачите на странскиот јазик.
Проектот има оригинален карактер поради тоа што се става акцент на практичната примена на интеркултурната прагматика во наставата и неговата ориентација
кон глобално релевантна и сè уште недоволно истражена тема. Резултатите
имаат потенцијал за значајно унапредување на наставните програми и создавање
наставни модули со применлива вредност за европската и пошироката академска
заедница, отворајќи можности за меѓународна соработка во областа на применетата
лингвистика, наставата по втор странски јазик и интеркултурната комуникација.