Адјувантна хормонска терапија по радикална простатектомија кај пациенти со карцином на простата

На глобално ниво, ракот на простата претставува најчесто малигно заболување кај мажите, со околу 1,4 милиони новодијагностицирани случаи годишно. Инциденцата е тесно
поврзана со возраста. Истражувањата покажуваат дека додека кај мажи на возраст од 30 години преваленцата е околу 5%, таа се зголемува за 1,7 пати за секоја наредна деценија
од животот достигнувајќи 59% кај мажи на 79-годишна возраст. Во светски рамки, со 375.304 смртни случаи, ракот на простата се наоѓа на петто место според морталитетот.
Во нашата земја, со 371 смртни случаи и стапка на смртност од околу 7,1%, се рангира на трето место како причина за смрт од малигни заболувања. Прогнозата на пациентите
зависи од возраста, хистолошкиот вид на туморот, степенот на малигнитет (Gleason score), вредноста на простатно-специфичниот антиген (PSA), стадиумот на болеста иприсуство
на коморбидитетите. Со цел унапредување на клиничката практика и унифициран пристап во третманот според водечките уролошки асоцијации (Светската, Европската и Американската), радикалната простатектомија се препорачува кај пациентите со
локализиран и локално напреднат карцином. Хормонската терапија како прва линија на терапија се користи кај пациенти со метастатска болест, а како адјувантна хормонска
терапија се користи по хируршка или радиотерапија во случаи со далечни метастази или при зафаќање на блиските структури. Нашето истражување опфати 69 случаи со радикална простатектомија. Поради степенот на агресивност на карциномот и стадиумот на болеста, на 14 пациенти беше индицирана адјувантна хормонска терапија. Ефикасноста
на хормонската терапија беше оценета преку вредноста на PSA во тек на неколку последователни месеци во првата година, како и преку клинички параметри. Кај сите случаи беше забележано значително намалување на PSA вредностите и подобрување на клиничката слика.
Клучни зборови: простатектомија, PSA, адјувантна хормонска терапија.