Третман на отпадни води од тунели во светот и кај нас

Третманот на отпадни води е клучен за заштита на водните ресурси и овозможува нивна
повторна употреба во земјоделство, индустрија и урбани системи. Посебен предизвик е
управувањето со отпадни води од тунели, кои често содржат мешавина од атмосферска и
подземна вода, масла, тешки метали и суспендирани материи. Потребен е специфичен
пристап што комбинира механички, хемиски и биолошки методи на прочистување. Во
светот се користат различни системи за третман на тунелски отпадни води како што се:
механички филтри, сепаратори за масла, мембрански технологии и биореактори, кои
овозможуваат и повторна употреба на водата. За жал, во Северна Македонија третманот на
тунелски отпадни води сѐ уште е во почетна фаза. Исклучок се тунелите на автопатот Демир
Капија – Смоквица каде има поставено основен механички систем. Останатите тунели
немаат организиран систем, што претставува еколошки ризик. Во овој труд се анализирани
постојните практики и технологии за третман на тунелски отпадни води кај нас, со акцент
на тунелите Демир Капија – Смоквица. Направена е споредба помеѓу македонските и
светските современи решенија применети во тунели во Малезија, Швајцарија, Шведска и
Чешка и предложени се практични мерки за рационално искористување и интеграција во
одржливи еколошки системи. Предложените мерки опфаќаат воведување на интегрирани
системи за третман и повторна употреба на прочистената вода во технички цели, како што
е снабдување на противпожарни системи или хидрауличко ладење, со што би се намалил
притисокот врз природните ресурси и би се зајакнала одржливоста на инфраструктурните
објекти.