Прекумерен туризам

Книгата „Прекумерен туризам“ е наменета за сите кои работат во секторот туризам и угостителството, за академската јавност, студентите, истражувачите, учениците, заинтересираните страни од приватниот, јавниот и невладиниот сектор кои директно или индиректно се поврзани со туризмот. Книгата е изготвена со цел да се збогати постоечката литература поврзана со проблематиката на современите трендови и тенденции во туризмот и прекумерниот туризам. Материјалот во книгата е поделен во три основни поглавја.
Првиот дел е посветен на основните аспекти на туризмот, а опфатен е материјалот кој се однесува на поим и развој на туризмот, современи трендови во туризмот и статистички показатели за туризмот во Република Северна Македонија.
Во вториот дел се обработува материјата поврзана со прекумерниот туризам, неговите импликации и решенија. Во овој дел се опфатени дефинирањето на прекумерниот туризам, еволуцијата на прекумерниот туризам, влијанија на туризмот врз животната средина, носечки капацитет за туризам, социјалните медиуми и прекумерниот туризам. Исто така, опфатени се теми поврзани со алтернативните форми на туризам како одговор на прекумерен туризам, туристичка политика и управување со прекумерен туризам, сезоналност во туризмот, списокот на светското наследство на УНЕСКО и прекумерен туризам, како и прекумерен туризам во туристички места и рурални средини.
Во третиот дел од книгата се обрнува внимание на материјалот кој ги третира меѓународните искуства поврзани со прекумерен туризам, како препораките на Светска туристичка организација поврзани со прекумерен туризам, прекумерен туризам во земјите од Европската унија и дестинации со прекумерен туризам во светот – примери и практики.
Имајќи предвид дека ова е прво издание на книгата, можеби сме пропуштиле некои важни елементи поврзани со прекумерниот туризам. За сите забелешки, мислења и коментари, авторите ќе Ви бидат благодарни и ќе ги земат предвид при создавањето на второто дополнето и проширено издание. Исто така, искажуваме благодарност и до сите наши колеги и соработници кои дадоа придонес во обезбедувањето на неопходните материјали за комплетирање на книгата, како и на рецензентите за укажаните искрени и конструктивни сугестии.