Бенефит од интравенска склерозација на инсуфициентни површни вени, кај пациенти со симптоматска периферна артериска болест

Цел: Да се утврди ефектот од интравенска склерозација на инсуфициентни површни вени (vena saphena magna и vena saphena parva) врз артерискиот проток кај пациенти со симптоматска периферна артериска болест (ПАБ).
Методи: Во студијата беа вклучени 90 пациенти со дијагностицирана ПАБ и хронична венска инсуфициенција. Кај сите пациенти беше спроведена доплер сонографија на површна феморална артерија (ПФА), поплитеална артерија (ПА), задна тибијална артерија (ЗТА) и предна тибијална артерија (ПТА), пред третманот и на интервали од 1, 3, 6 и 9 месеци по склерозацијата. Анализата беше насочена кон мерење на пик-систолен (ПС) проток, со категоризација на вредностите (1–14, 15–25, 26–35, 36–45 и >45 cm/sec).
Резултати: Пред интервенцијата, значителен број пациенти имаа отсуство на артериски проток (33.33% во ПФА; 20% во ПА; 25.56% во ЗТА; 32.22% во ПТА). Веќе по првиот месец по интервенцијата, беше забележано значително зголемување на пациенти со нормален PS проток (>45 cm/sec) низ сите испитувани артерии: ПФА (62.22%), ПА (56.67%), ЗТА (56.67%), и ПТА (55.56%). Овие вредности останаа стабилни и во 3-тиот, 6-тиот и 9-тиот месец, со одржано значително подобрување на артерискиот проток (п<0.05 за ПФА; тренд на подобрување за останатите артерии). Највпечатливо, кај 20 од 30 пациенти со иницијално отсутен проток низ ПФА, по интервенцијата беше воспоставен нормален ПС проток. Слични подобрувања беа забележани и кај другите артериски сегменти.
Заклучок: Склерозацијата на инсуфициентните површни вени кај пациенти со ПАБ резултира со значително и перзистентно подобрување на артерискиот проток, особено во феморалната и поплитеалната артерија. Ова укажува дека третманот на венска инсуфициенција може да има позитивен ефект врз периферната артериска циркулација кај пациенти со комбинирани васкуларни патологии. Овие наоди го поддржуваат интегрираниот пристап во третманот на ПАБ и отвораат можности за понатамошни истражувања на васкуларната поврзаност помеѓу венскиот и артерискиот систем.