Влијание на резистентноста на ацетилсалицилната киселина врз клиничката слика на исхемичен мозочен удар и појавата на рецидиви

Вовед: Aцетилсалицилната киселина (АСА) е најчесто применуван антиагрегант за третман на исхемичен мозочен удар (ИМУ), но резистентноста на АСА варира од 5% до 60% во различни популации. Целта на оваа студија беше да се утврди преваленцијата на резистентност на АСА кај пациенти со ИМУ
и да се испита нејзината поврзаност со демографските карактеристики, ризик факторите, повторен удар и сериозноста на клиничката слика.
Методи: Вклучивме 100 последователни пациенти со примарен или повторен ИМУ, дијагностицирани преку компјутеризирана томографија (КТ) или магнетна резонанца (МРИ). Резистентноста на АСА беше тестирана со системот Innovance PFA 200 по најмалку еден месец редовна употреба на 100 mg АСА дневно. Клиничката сериозност на ИМУ беше оценета преку скалите NIHSS и mRS.
Резултати: Преваленцијата на резистентност на АСА во нашата студија беше 32%. Пациентите со резистентност на АСА беа статистички значајно постари (69.9±7.5 наспроти 61±1 години), главно мажи (75% наспроти 45.6%) и со претходен кардиоваскуларен настан (р<0,05). Дополнително,резистентноста на АСА беше поврзана со значително поголема инциденција на повторен ИМУ
(75% наспроти 22.05%, р<0,05). Сепак, не беше утврдена значајна корелација помеѓу резистентноста на АСА и сериозноста на ИМУ според скалите NIHSS и mRS. Користејќи ANOVA, хемоглобинот, хематокритот, возрастa, гликемијата на
гладно и присуството на дијабетес имале статистички значаен ефект на категоријата на тежина на мозочниот удар (p<0,05).
Заклучок: Резистентноста на АСА кај пациенти со ИМУ се јавува почесто со стареењето, кај машки пол и лица со претходни кардиоваскуларни заболувања. Резистентноста на АСА не влијае директно врз сериозноста на клиничката слика на ИМУ, но го зголемува ризикот од повторување на ИМУ.
Клучни зборови: резистентност, ацетилсалицилна киселина, исхемичен мозочен удар, NIHSS, mRS, повторен исхемичен мозочен удар.