Бенефитите на дождовните црви (Anelida: Lumbricidae) за здравјето на почвата

Дождовните црви (Anelida: Lumbricidae), имаат големо значење за здравјето на почвата, што вклучува зголемување на плодноста на почвата, подобрување на дренажата на почвата, подобрување на структурата на почвата при што се добива подлабоко растење на коренот, „поправка“ на оштетената почва.
Практиките кои ги применуваат земјоделците, како што се обработката на почвата, прекумерното ѓубрење, монокултурата и примената на пестициди често доведуваат до зголемена ерозија на почвата, распаѓање на содржината на органска материја, засолување и набивање, што може да доведе до намалување на продуктивноста на културите и биодиверзитетот на почвата и последователни социоекономски загуби. Заради тоа, се јавува потреба за развивање стратегии за одржливо менаџирање на почвата, на кој начин ќе се создаде соодветна микроклима и живеалишта, поволни за биодиверзитетот на почвените без’рбетници.