Современите методи за пресметка на трошоците како основа за подобрување на конкурентската предност на компаниите

Апстракт. Управувањето со трошоците значи нивно рационално намалување со основна
цел зголемување на профитабилноста на компаниите. Ефикасното управување со трошоците
овозможува реализација на поставените цели на работењето и остварување конкурентска предност
на компаниите на пазарот. Ова всушност значи поефикасна употреба на расположивите ресурси
и строга контрола на трошоците, преку намалување на активностите што резултираат со високи
трошоци. Поради интензивните промени во технологијата и пазарните услови, традиционалните
сметководствени системи за пресметка на трошоците станале несоодветни. Тие се појавиле во време
кога многу компании имале мал обем на производство, а директната работна сила и материјалите
биле главните трошоци на производството. Денес, ситуацијата е значително променета. Компаниите
произведуваат во големи размери, директната работна сила има мал удел во вкупните трошоци, а
оперативните трошоци се зголемуваат.
Во обид за поефикасно управување со трошоците развиени се бројни современи методи за
нивна пресметка, со што се овозможува донесување на оптимални деловни одлуки и зголемување
на успешноста во работењето на компаниите.
Клучни зборови: трошоци, управување, пресметка, методи, одлучување, современи