Перинатална кардиореспираторна физиологија

Прво и основно разбирање на спецификите во анатомијата и физиологијата на новороденчето е дека тоа ниту е „мал возрасен човек”, ниту пак „мало дете”. Повеќе органи и системи имаат единствени, уникатни специфики кај новороденчето, а познавањето на нивната анатомија и физиологија е од интерес за реанимацијата, водењето на анестезијата, и администрирањето на терапија. Сите органи и органски системи претрпуваат еден период на прилагодување, но од функционален аспект, најмногу промени трпат респираторниот систем, кардиоваскуларниот систем, терморегулацијата, имунолошкиот и ензимскиот систем.