Биолошки опасности во храната

Големиот метил или т.н говетски метил (Fasciola hepatica) спаѓа во групата на сплескани црви (Trematodes) кој паразитира во билијарните канали на црниот дроб, жолчното ќесе, ретко во белите дробови и крвните садови на човекот и животните (говеда, овци, кози, срни, елени, зајци), негов преоден домаќин е барскиот полжав (Limnea truncatula).
Просечната должина на големиот метил изнесува околу 3cm додека ширината околу 13mm и од тие причини спаѓа во групата на најголеми метили. Има дорзовентрално сплескано тело во форма на лист, кој се шири од предниот кон задниот дел. Поседува силна мускулна пијавка во усниот и стомачниот дел со која се прицврстува за внатрешните органи на домаѓинот каде што паразитира. Не поседува крвен и респираторен систем но, за сметка на тоа многу добро е развиен системот за размножување. Станува збор за хермафродитен организам способен за вкрстено оплодување и самооплодување.