Примена на меничните правила врз товарните листови

Вовед
Предмет на анализа и елаборација во овој труд е прашањето за примена на меничните правила врз товарните листови издадени во домашниот, особено во меѓународниот транспорт. Товарните листови претставуваат исклучително битен инструмент во транспортот, и воопшто во трговијата. Брзиот и масовен промет на стоки, како и учеството на бројните субјекти во низата транспортни маршрути, им дадоа особено значење на товарните листови во глобалниот транспорт. Експанзијата на товарните листови и нивната повеќе страна функција во прометот, наметнаа бројни и разновидни прашања за анализа. Од нив особено комплексно и значајно е прашањето за преносот на правата инкорпорирани во товарните листови.
Иако законските одредби манифестираат компатибилна и симплифицирана примена на меничните правила, анализите покажуваат поинаква фактичка состојба. Попрецизно кажано, покажуваат дека не постои докрај дефиниран режим на примена, кој што соодветствува на реалната/фактичката состојба на полето на транспортните услуги.