Музичката традиција во Коџаџик – колепката на семејството на Ататурк

Интересот за проучувањето на музичка традиција на Коџаџик се роди од сознанијата за богато историско минато на местото, спецификите на населението Турците-Јуруци и потеклото на семејните корени на големиот лидер таткото на современа Турција Мустафа Кемал Ататурк. Продлабочувањето во истражуваната материја, во непресушниот извор на фолклорното наследство покажа дека музичката традиција денес, и покрај стеснување на некои делови од музичката практика, аналогно и на музичкиот репертоарот, се уште гордо пркоси на предизвиците на современото живеење. Сево ова произлегува од исконската љубов, почитта и потребата на населението за зачувување на вредностите на наследената традиција како печат на нивниот личен идентитет. Бидејќи, песните се извор и сведоштво, хронолошки сопатник и своевиден креативен документ на повеќе настани што низ векови се создавале или опстоеле меѓу нив.