Нови сознанија за состојбата на подземните рударски простории под трасата на експресниот пат A2 – Коридор VIII, кај с. Гиновце, Крива Паланка

За потребите на безбедно одвивање на градежните активности во периодот
јануари-март, 2023г, извршени се соодветен обем на геолошки, геофизички,
инженерскогеолошки и геотехнички истражувања и испитувања, со цел утврдување на
положбата и состојбата на подземни рударски простории од поранешен рудник за
експлоатација на бентонитски глини, кај усек 9 [km 14+270 – 14+895] на Експресен пат А2,
делница Длабочица - Чатал.
Основна цел на предметните истражувања и испитувања, изведени од јануари до март 2023,
е да се одреди влијанието на старите рударски работи кои се одвивале до деведесетите
години од минатиот век, за експлоатација на бентонитски глини од страна на рудникот
„Бентомак“ - Крива Паланка врз изградбата на патната инфраструктура на усекот.
Теренските истражувања направени за овој усек се според националните стандарди и
регулативи, односно препораките од Правилникот за технички нормативи во градежништво
на Р.Македонија и Еврокод 7. Сите податоци добиени од теренските истражувања и
лабораториските испитувања се искористени за дефинирање на положбата на подземните
простории и состојбата на материјалите. Тие понатаму ќе послужат за подготвување
документација за оценка на влијанието на подземните простории на експресниот пат и
техничко решение за санација на усек 9.