Вид и обем на геотехнички истражувања: примарни фактори за соодветни геотехнички подлоги

При проектирање на косини кај патишта, од големо значење е видот и обемот на изведените
геотехнички истражувања и испитувања, со цел да се проектира економски и технички
издржано и практично решение. Во овој труд се прави преглед и согледување на направени
измени на технички решенија за усеци во фаза на изведба, во однос на она проектираните.
Предмет на овие анализи се косините од усеците на Експресен пат А4, делница Штип –
Радовиш. Потребата за повторно проектирање на косините се должи на нивната нестабилност,
констатирана во фаза на изведба или непосредно по нивната изведба. Причината за ова се
неадекватните технички решенија, кои главно се должат на недоволниот обем на теренски
испитувања и истражувања, односно, плитки раскопи и бунари, што во овој случај резултира со
нереално дефинирање на карпестите маси од аспект на постојаност, распаднатост, јакост,
моќност на слој итн., со што се добива лажна претстава за средината во која треба да се изведе
трајната косина. Крајно, се усвојува несоодветен наклон за претпоставениот тип на материјали.
За анализираната патна делница во изведба, направен е преглед на бројот и видот на изведени
претходни и дополнителни (нови) геотехнички истражувања, на бројот на задржани технички
решенија од основен проект и бројот на нови проектирани технички решенија, како и преглед
на нови проектирани и изведени наклони на косини во карпи и почви, соодветно.