82 години Фолклорно дружење

На 4 јуни 2026 година, во рамките на свечениот концерт по повод 82 години фолклорно дружење на Ансамблот „Тоска“ од Штип, како гостин настапи проф. д-р Илчо Јованов со изведба на орото „Печалбарски мерак“. Настанот претставуваше значаен културен момент, посветен на зачувувањето, негувањето и промоцијата на македонското фолклорно наследство, а воедно и можност за оддавање признание на долгогодишната традиција на ансамблот и неговиот придонес во културниот живот на градот Штип.
Особено значајна димензија на овој настап е личната и уметничка поврзаност меѓу проф. д-р Илчо Јованов и директорот на Ансамблот „Тоска“, Благој Џоџев. Нивната поврзаност започнува уште од најрана возраст, како членови на КУД „Штипски трендафили“, каде Благој Џоџев бил најмладиот играорец, а Илчо Јованов најмладиот инструменталист во оркестарот. Ова заедничко фолклорно искуство претставува основа на нивниот понатамошен уметнички развој, но и сведоштво за континуитетот на македонската традиција што се пренесува од генерација на генерација.