Улогата на криопротектантот во морфолошката структура на лиофилизирани микрочестички со канабидиол

Канабидиолот (CBD) претставува фитоканабиноид, изолиран од Cannabis sativa L.
CBD, нeма психоактивни својства, но се употребува како аналгетик, дејствува како
антиконвулзив и невропротектив, а експериментално се користи и при некои други состојби.
Еден од начините да се подобрат биофармацевтските својства и стабилноста на CBD е тој
да се инкапсулира со помош на биополимери во форма на микрочестички. Целта на
истражувањето е да се испита како инкорпорирањето на криопротектант влијае врз
морфологијата и микроструктурата на лиофилизираните микрочестички со CBD. Освен
масло од CBD, употребени се и полимерни соединенија, како што се протеински изолати
од грашок и сурутка, скроб и арапска гума. За изработка на формулациите беа користени
методите: комплексна коацервација, емулзификација и лиофилизација, со и без употреба
на криопротектант сахароза. Беа изработени три формулации со 3 mL CBD 20% масло.
Како матрикс системи беа користени комбинации од протеини, полисахариди и протеини-
полисахариди во сооднос 1:1. Со примена на избран протокол за лиофилизација (со трите
основни сегменти: замрзнување, примарно и секундарно сушење), примероците беа
лиофилизирани (модел LABCONCO FreeZone6), при што само три од вкупно шест
примероци беа третирани со криопротектант сахароза 5% w/v. Сите шест примероци потоа
беа скенирани со скенирачки електронски микроскоп (SEM) (VEGA3 LMU SEM (TESCAN)),
при што микрографските фотографии покажаа дијаметар на микрочестички од 7 μm до 40
μm. Во формулациите со криопротектант се забележува површински филм што ги
обложува микрочестичките со неправилна сферична до аглеста форма. Кај формулациите
без криопротектант се забележуваат сферични микрочестички со присутни кристали. Иако
криопротектантот има значајна улога во формулацијата на микрочестички со CBD и може
да ја подобри порозноста и морфологијата, сепак се неопходни дополнителни испитувања
со цел да се утврдат големината, индексот на полидисперзност и зета потенцијалот за да
се потврдат стабилноста и соодветноста за инкапсулација на CBD.