Од форензички факт до правна квалификација: убиство на подмолен начин во судската практика

Овој труд претставува интердисциплинарна анализа на кривичноправниот поим
„подмолен начин“ при извршување убиство преку спојување на правната интерпретација со
судско-медицинските наоди од обдукцијата. Истражувањето ги опфаќа одлуките за убиство
на подмолен начин на три судски инстанци во Република Северна Македонија ‒ Основен
суд Струмица, Апелационен суд Штип и Врховниот суд ‒ со цел да се утврди како судовите
ги вреднуваат форензичко-медицинските докази при квалификацијата на делото. Особено
внимание се посветува на односот помеѓу објективните елементи (положбата на жртвата,
насоката и карактерот на повредите, реконструкцијата на настанот) и субјективниот елемент
на умислата. Резултатите покажуваат дека обдукцискиот протокол и исказите на вештите
лица имаат пресудна улога во разјаснувањето на механизмот на повредите и околностите на
нападот, со што значително влијаат врз правната квалификација на делото. Трудот заклучува
дека доследната интеграција на правната аргументација и судско-медицинското вештачење
се неопходни за прецизно толкување на „подмолниот начин“, обезбедувајќи усогласена
судска практика и почитување на стандардот на докажување „надвор од разумно
сомневање“.