Примена на екструзивни 3D-принтери во развој на персонализирани педијатриски лекови

3D принтерите од екструзивен тип претставуваат иновативна алатка за изработка на персонализирани дозирани форми преку прецизно, слоевито истиснување на активни и помошни супстанции. Основата на овие техники е материјално-екструзионното печатење, кое се базира на контролирано истиснување на материјал (филамент, гел, паста или прав) низ млазница. За фармацевтска примена, најзначајни се трите типови на екструзивни 3D печатачи: Fused Deposition Modeling (FDM), Pressure-Assisted Microsyringe (PAM) и микроекструзијa. Преку дигитално моделирање и on-demand производство, може да се креираат лекови за одреден пациент, со вклучување на саканата активна супстанција во матрица соодветна за неговата возраст и вкус. Овој пристап овозможува лекот да се изработи веднаш кога е потребен, прилагоден за конкретен пациент, со што се поддржува принципот на магистрална и персонализирана фармација. Екструзијата е избрана за педијатриска примена затоа што овозможува персонализација, подобра палатабилност, лесна администрација, комбинирање на повеќе лекови и производство на термочувствителни формулации. Примери за успешна примена се: џвакалки со ибупрофен и овошни вкусови, со брзо ослободување и висока органолептска прифатливост – погодни за деца со потешкотии при голтање; ородисперзибилни таблети со хидрохлоротиазид, добиени преку микроекструзија, кои демонстрираат точна маса, униформност на содржина и висока прецизност при печатењето; гумени формулации со ламотрижин, кои ја подобруваат адхеренцата кај педијатриски пациенти благодарение на лесната администрација и визуелната привлечност. Изборот на соодветна техника, материјал и параметри за печатење е клучен за добивање на квалитетни, прифатливи и персонализирани дозни форми. Екструзивното 3D-печатење претставува силна основа за иднината на персонализираната медицина, особено во педијатриската популација, каде што прилагодувањето на лекот според индивидуалните потреби е клучно за успехот на терапијата.

Клучни зборови: 3D-печатење, педијатриски лекови, екструзија.