Насликани зборови

На почетокот беше, Зборот...
Светол.
Јасен.
Моќен.
Како најдлабока промисла и како водилка низ животот.
А, низ животите и зборови едноставни, но промислени и милни, но и прости и необмислени, оловно тешки, како куршуми! Низ животите во рој од зборови- во реки, во езера и во мориња од зборови разни!
Но и зборови радосни, во кои радоста ни со крик не се опишува!
И зборови таговни, кои притискаат и печат, како грутка која не се проголтува!
Еден ингениозен книжевен ум, точно на овие зборови, необично радосни или исклучително тажни и неискажливи, им одредил име и ги нарекол-Неименливото!
Еден огромен простор од пејзажите на нашите души ги исполнуваат токму тие зборови, од корпусот наречен-Неименливото! .....................................................
Две наши ликовни уметници, во еден животен и уметнички период кој во Стара Атина се нарекувал АКМЕ, Касиопеја Наумоска и Катерина Деспот, пливаат низ навидум различни уметнички траектории-и тоа го прават исклучително умешно и успешно! Освен врвноста во уметничкиот израз, нив секако ги спојува и високиот степен на образованост и врвна едуцираност. И двете образуваат и воспитуваат млади генерации- тие и професионално се владетелки на зборот! .....................................................
„Насликаните зборови“ на Касиопеја и Катерина, тоа се тие неискажливи, нераскажливи и некажани зборови од пејзажите на нашите души, од корпусот на она што го нарекуваме Неименливо! Насликаните зборови се и радоста што не се крикнува со збор, но и грутката од болка и тага, што ниту се голтнува, ниту со збор се изустува! Музичарот нив ги преточува во ноти и музика, книжевникот во стих или писмо, ликовниот уметник во слика или скулптура. .................................................................................................. Само навидум така различни, Касиопеја Наумоска и Катерина Деспот, наши врвни уметници и интелектуалки, преку заедничката уметничка концепција, наречена „Насликани зборови“, се препознаваат меѓусебно и лесно го препознаваат патот до публиката, преку ликовниот израз со кој го дешифрираат своето Неименливо. Нивното Неименливо!
Нашето Неименливо, кое и сега, преку оваа изложба, непогрешливо спојува и нè пресоздава, повторно во Збор!
д-р Васко Шутурков Мај 2025