Балканските војни низ фотографии (1912-1913) микроисторија

Со книгата што е пред нас, започнуваат истражувањата
на условно определениот „втор дел“ од нашиот продолжителен научноистражувачки интерес кој започна пред три години, со објавувањето на учебникот Балканските војни и Првата светска војна (2022), наменет за студентите од групата Историја со археологија при Универзитетот „Гоце Делчев“ од Штип. По заокружувањето на делот во којшто е претставен периодот на Првата светска војна и особено случувањата на Македонскиот
фронт, преку целината на книгите: Лексикон
на Македонскиот фронт (1915 – 1918), Алманах на Македонскиот фронт (1915 – 1918), 25-от час на Македонскиот фронт (1915 – 1918) и Македонскиот фронт низ фотографии (1915 –
1918), објавени во текот на 2023 и 2024 година, од
оваа година и со оваа книга, според хронолошки преметнатиот
но логичен след на нештата, нашиот истражувачки фокус се преместува на периодот на Балканските војни (1912 – 1913), преку целината на книгите во која освен оваа, ќе бидат опфатени уште три книги.Сметаме дека ваквиот пристап не само што ја објаснува улогата на оваа книга, туку го открива
и нејзиниот потенцијал во оформувањето на едно алтернативно историско разбирање на Балканските војни, чијашто визуелна историја, на ваков начин, може да ја изгради секој од нас.