Спектрофотометриска евалуација на разликите во бојата помеѓу природните заби и клучевите за избор на боја

Цел: Целта на ова истражување беше да утврдиме дали клучевите за избор на боја кои најчесто се
употребуваат во праксата со нивните нијанси, можат целосно да ја претстават бојата на природните
заби без притоа да се појави визуелно неприфатлива колорна разлика.
Материјали и метод: Бојата на максиларниот централен инцизив кај вкупно 235 пациенти беше
инструментално евалуирана со спектрофотометар со оптичка геометрија 45/0° ShаdePilotТМ.
Инклузионите критериуми беа: природен витален инцизив без кариозни лезии и реставрации, без
внатрешни и надворешни дисколорации, без ерозии и абразии. Разликите во бојата (претставена
преку величината Delta E) беа споредувани со следните клучеви VITA CLASSICAL(VC), IVOCLAR
CHROMASCOP (IC) И VITA 3D-MASTER(V3DM). Како праг за неусогласување на бојата беше избранa
вредноста на Delta E > 3.3.
Резултати: Разликите во бојата Delta E одредувана според VC клучот варираа во рангот од 0,77 за
најмалата разлика до 8,78 Delta E единици за најголемата разлика. Вредноста на Delta Е одредувана
со IC клучот варира во интервалот од 0,43 до 9,28. Кај V3DM клучот се движи во рамките од 0,32
до 5,32 Delta E единици. Разликата помеѓу Delta E за VitaClassical во однос на IvoclarChromascop
клучот не е сигнификантна p>0,05 (p=0,61), додека во однос на Vita3D - Master разликата е статистички
сигнификантна p<0,001(p=0,000). Притоа просечните вредности на Delta E одредувани со VitaClassical
клучот се значајно поголеми. Помеѓу ICи V3DM постои значајна разлика p<0,001(p=0,000) во просечните
вредности на Delta E. Притоа вредностите на Delta E за IC клучот се сигнификантно поголеми од оние
добиени со V3DM.
Заклучок: Најголеми разлики во покривањето на нијансите постои кај Ivoclar Chromascop клучот, потоа
кај Vita Classical. Vita3D Мaster клучот имa најмало отстапување во разликите на бојата со природните
заби, но сепак ниеден клуч целосно не го опфаќа распонот на нијанси кај природните заби.