Изложба со староградски носии

Староградските носии од етнолошката поставка во музејот во Штип се непроценлива инспирација за создавање на нови модели кои ја симболизираат богатата културна историја на македонската жена, преку која се манифестирале сите културни движења во поглед на облеката како една од многуте значајни арте факти кои ја карактеризираат културата на македонците.
Преку овој тип на облека се обидовме да ги прикажеме основните кроеви на староградската носија, следејќи ги и промените кои настанале во периодот од крајот на 19 век па до втората половина на 20 век, период во кој староградската носија е сеуште маркантен симбол за нивна визуелна идентификација.
Во овој период како резултат на промените од традиционален сточарски кон стациониран начин на живот како и асимилација и интеграција со месното население, носијата почнала да трпи поединечни трансформации како во својата структура така и во својата функција, естетска, материјалната база и слично, за на крај да биде заменета со новиот ala-franga модел, со што исчезнал визуелниот ефект за етничката идентификација на етничките заедници.