Марко Цепенков - меѓник меѓу два стожерни македонски века

Цепенковото перо остави огромен квантум на фолклорно, етнографско и јазично богатство, една слоевита карпа од мудрост, знаење, историја и култура. Прилепскиот мудрец ги постави македонските духовни меѓи, со донкихотовска храброст и сизифовска упорност го надживеа времето во кое живеел, скудно, сиромашно, без никаков потстрек за духовен развој. Марко Цепенков е самоник среде див, необработен предел, никнат на плодна почва, на меѓата меѓу двата стожерни македонски века, едниот, век-семе и никулец,
а другиот век-стебло и крошна.