Изложба во Штип - „Биопрогресија“

Внурнувајќи во „магичните светови“, мајсторски отелотворени во последните
ликовни остварувања на сликарот Јордан Ефремов, стануваме сведоци на еден органски
свет со реминисцентни задршки на антропоморфни претстави и вегетациски асоцијации,
но тоа е таков пулсирачки хибрид во кој и покрај повременото отсуство на конкретна
фигурација и препознатлива форма или облик ,сепак формите респирираат, имаат свој
бит, генеологија, стратиграфија.
Самиот наслов на циклусот „Биопрогресија“ сугерира на биоморфната и
метаморфната структура која Ефремов ја третира, навлегувајќи и во био-генетичките
области и лабораториските модификации, експерименти, клонирања кои создаваат
нови, артифициелни организми и светови, прогресирани и отелотворени со помош на
надмоќноста на човековиот вид и развитокот на неговиот умствен капацитет.