Епидемиите во вардарскиот дел на Македонија и борбата со нив за време на војните (1912-1918)

Од 1912-1918 година настапил трагичен период за македонскиот народ кога се случиле двете балкански и Првата светска војна и дури четири пандемии на тешки и смртоносни заразни болести. Првата светска војна, исто како и претходните две балкански војни, во поголем или помал обем, се одвивале на два фронта, на едниот се воделе борбите меѓу завојуваните страни, а на другиот фронт се војувало со катастрофалните епидемии од заразни болести. За ваквата трагедија на Македонија разбрал и целиот свет и благодарение на помошта и солидарноста што ја упатиле многу светски влади епидемиите биле запрени а дел од населението и војската спасени. Присуството на странски лекари и значењето на нивната работа, во војните, било од непроценлива важност за населението од тој период. На територијата на Македонија, пристигнале голем број балкански и европски лекари-доброволци.