Инклузивно образование во редовната настава - очекувања и проблеми

Инклузивното образование подразбира вклучување на децата со посебни потреби во редовниот воспитно-образовен процес, па нужно се наметнува потребата од негово концепирање како дел од една поширока стратегија која би промовирала задоволување на основните потреби, права и слободи на сите, независно од разликите. Трудот има за цел да укаже на проблемот од постоење предрасуди, страв и незнаење како главни причинители за ексклузија на оние кои се поинакви. Притоа, допрени се системските и други бариери во остварување на концептот за инклузивно образование. Истовремено, направен е преглед на основните нормативни решенија и меѓународни документи од оваа проблематика. Трудот прави и осврт на неколку фундаментални прашања врз кои почива концептот на инклузивно образование: односот на наставниот кадар, потребата од дополнителна обука, прашањето за промена на училишните планови и методологија за работа на час. На крај, предложени се активности за поддршка на сите вклучени во инклузивното образование, како концепт кој сам по себе претставува одговорност на сите во општеството.