Проект Greenstars - Choose Science! (Horizon Europe – MSCA) Sci-Waste: Future-Form - модна ревија во рамките на Европската ноќ на истражувачи 2026

Во рамките на проектот CHOOSE SCIENCE – „Избери наука! Градење на општеството преку истражување и иновации“, на 25 септември 2026 година, со почеток во 18 часот, во спортската сала „Јордан Мијалков“ во Штип се одржа настанот „Уметност и наука под ѕвездите“. Во рамките на програмата, студентите на Технолошко-техничкиот факултет при Универзитетот „Гоце Делчев“ се претставија со модната ревија „Sci-Waste: FUTURE-FORM – Decoding waste, coding future“.

„Sci-Waste: FUTURE-FORM“ е експериментален дијалог помеѓу хаосот на текстилниот отпад и можностите за негова креативна реконструкција. Колекцијата ја истражува точката во која имагинацијата, дигиталните технологии и тридимензионалните структури му даваат нов, неочекуван живот на она што системот го прогласил за вишок.

Преку спој на отфрлени текстилни материјали, експериментални форми и елементи изработени со 3Д-печатење, креациите ги преиспитуваат границите меѓу модата, уметноста и науката. Отпадот станува почетна точка за истражување, а дизајнот – средство за создавање нова естетска, функционална и симболичка вредност.

Предизвикот го надминува редизајнот: тој подразбира преиспитување на начинот на кој ги вреднуваме материјалите и нивниот потенцијал за понатамошна употреба. Со овој пристап, „Sci-Waste: FUTURE-FORM“ отвора нови перспективи за одржливата мода и ја истакнува улогата на студентската креативност и интердисциплинарната соработка во обликувањето на иднината.