Описни методологии за избор на рударски откопни методи

Правилниот избор на рударска откопна метода претставува еден од најзначајните предуслови за успешно и економично експлоатирање на подземните рудни лежишта. Изборот на соодветна откопна метода е сложен процес, кој зависи од голем број фактори поврзани со геолошките и геометриските карактеристики на рудното лежиште, како и со условите на околниот карпест масив. Во развојот на рударската наука и практика, за избор на откопните методи првично биле применувани едноставни описни и класификациски пристапи, засновани на меѓусебно поврзување на карактеристиките на рудното лежиште со применливоста на одделни откопни методи.
Во овој труд се разгледуваат и анализираат описните методологии за избор на подземни рударски откопни методи. Посебно внимание е посветено на методологиите развиени од Boshkov и Wright, Hartman и Morrison, кои претставуваат значајни класични пристапи во процесот на избор на откопна метода. За секоја методологија се анализираат основните принципи, параметрите што се земаат предвид, начинот на класификација и избор на соодветна откопна метода, како и можностите и ограничувањата при нивната практична примена.
Целта на трудот е да се прикаже развојот и значењето на описните методологии, да се идентификуваат нивните заеднички и специфични карактеристики и да се изврши нивна меѓусебна компарација. Анализата покажува дека, и покрај нивната релативна едноставност и зависност од инженерската проценка, описните методологии претставуваат значајна основа за развојот на подоцнежните, посложени методологии за избор на рударски откопни методи.