Основи на клиничка фармакологија

Клиничката фармакологија претставува столб на современата медицинска практика, со клучна улога во рационалната употреба на лекови. Таа ги поврзува принципите на фармакологијата со конкретни клинички ситуации, обезбедувајќи научно заснован пристап кон лекувањето на пациентот. Овој учебник е наменет за студентите од општа медицина и фармација при Факултетот за медицински науки – Универзитет „Гоце Делчев“ – Штип, со цел да им овозможи длабоко разбирање и практична примена на клучните концепти од клиничката фармакологија.
Книгата започнува со прикажување на развојот на нов лек, вклучувајќи ги сите фази – од претклинички истражувања до добивање на одобрение за ставање на лек во промет и
негова употреба. Следствено, се разработуваат методологиите на клиничките испитувања, со посебен осврт на етичките принципи, дизајнот на студии и значењето на клиничките
докази за безбедност и ефикасност.
Понатаму, се обработуваат фармаковигиланцата и несаканите реакции на лекови, како и принципите за нивно следење, евидентирање и управување. Посебно внимание е посветено
на интеракциите на лековите, како и на начините на нивно препознавање и избегнување во клиничката практика.
Студентите ќе се запознаат со начинот на препишување на лекови како кај општата популација така и кај посебни категории на пациенти – новороденчиња и деца, стари лица,
препишување на лекови во период на бременост и лактација, како и кај пациенти со одделни патолошки состојби (хепатална и бубрежна инсуфициенција), каде што фармакокинетиката и
фармакодинамиката се значително променети и потребен е внимателен, индивидуализиран пристап.
Во учебникот се посветува особено внимание и на јатрогените болести – нарушувања предизвикани како последица на несоодветна употреба на лекови, кои претставуваат значаен клинички и етички предизвик во современата медицинска пракса.
На крајот, книгата го опфаќа и сегментот на терапијата на болка – како чест, но и сложен клинички предизвик. Во ова поглавје се осврнуваме на класификацијата на болката, изборот на соодветни аналгетици, принципите на рационална аналгезија и стратегиите за третман на акутна и хронична болка.