Активни и новодијагностицирани случаи со карцином на мочен меур за 2025 година во Струмица, Р.Северна Македонија

Резиме: Карциномот на мочниот меур претставува знaчаен јавно-здравствен проблем со растечка инциденца во светски рамки.Според податоците на World Health Organization и International Agency for Research on Cancer, тој се вбројува меѓу најчестите малигни неоплазми на уринарниот тракт и е меѓу првите десет најчести карциноми во светот. Болеста се карактеризира со висока стапка на рецидив, особено кај немускулно-инвазивните форми,што бара долгорочно и редовно цистоскопско следење. И покрај релативното добра прогноза кај раните стадиуми, карциномот на мочниот меур претставува заболување со значителен морбидитет, потреба од повторувачки интервенции и високи здравствени трошоци.
Најзначаен ризик - фактор за развој на карцином на мочниот меур е пушењето цигари кои по метаболизам се елиминираат преу урината и доаѓаат во директен контакт со уротелот. Други ризик фактори вклучуваат професионална изложеност на ароматични амини (во хемиската, текстилната и кожарската индустрија), хронични воспалителни состојби на мочниот меур, долготрајна катетеризација, претходна радиотерапија во карличната регија, како и употреба на одредени цитостатски лекови.
Цел: Целта на оваа студија е анализа на активните случаи на карцином на мочниот меур во текот на 2025 година, со посебен осврт на новодијагностицираните пациенти, нивните демографски карактеристики и клиничката презентација.
Материјали и методи: Оваа студија представува ретроспективна дескриптивна анализа на пациенти со карцином на мочен меур следени во текот на 2025 година во Уролошка амбуланта при ЈЗУ “Општа болница” Струмица. Добиените податоци се систематизирани, прикажани графички.
Резултати: Во оваа студија се вклучени се 98 пациенти: 26 новодијагностицирани во 2025 година и 72 пациенти дијагностицирани во претходни години и активни на контрола. Машкиот пол доминира со 73 пациенти (74,5% ). Женскиот пол е помалку броен со 25 пациенти (25,5%). Просечната возраст изнесува 67 години. Најзастапена е групата 61-70 години (48.0%). Најмладиот пациент е 47 годишна жена, а најстариот пациент е исто така жена, 81 годишна. Рецидив е забележано кај 34 пациенти или 34,6 % од кои кај : мажи - 25 (34,2%) жени - 9 (36%). Пушачи се 83 пациенти (84,7%) додека непушачи се 15 пациенти (15,3%). Позитивна фамилијарна анамнеза е присутна кај 6 пациенти (6,1%) додека 92 пациенти дале податок за негативна фамилијарна анамнеза.
Заклучок: Анализата на активните и новодијагностицираните случаи овозможува подобро планирање на здравствените ресусрси, унапредување на дијагностичките и терапевтските протоколи, како и подобрување на следењето на пациентите.
Клучни зборови: карцином на мочен меур, активни случаи, новодијагностицирани, пушење цигари
Област: Медицински науки и здравје