Евалуација на влијанието на фитопрепарати базирани на жолт кантарион (Hypericum perforatum) врз метаболизмот на иматиниб

Жолтиот кантарион (ЖК) е дел од традиционалната медицина и често влегува во
составот на различни видови на фитопрепарати, а пациентите со канцер често го користат
за суплементација (антидепресивно дејство). Во април 2024 година е земена
фармакотерапевтска анамнеза од 34 пациенти (18 мажи и 16 жени) со дијагноза хронична
миелоидна леукемија (ХМЛ), кои се на терапија со тирозин киназен инхибитор - иматиниб
(перорално, 400 mg дневно). Девет од пациентите (26,47%), покрај основниот лек, користат
фитопрепарати со ЖК. Со користење на софтверот Stockley drug interaction cheker е
утврдено дека доколку истовремено се користи ЖК и иматиниб потенцијалот за
настанување на мајорна интеракција е многу висок. Интервенирано е од страна на клинички
фармацевт, на пациентите им е укажано дека употребата на фитопрепарати од ЖК
истовремено со иматиниб може да доведе до терапевтски неуспех и неопходно е да се
прекине со истата. CYP3A4 е главниот изоензим одговорен за метаболизирањето на
иматиниб, што го прави потенцијално подложен на интеракции со бројни компоненти. Хиперицинот и хиперфоринот oд ЖК го индуцираат хепаталниот CYP3A4, но истовремено и P-
гликопротеинот. Според постоечките литературни податоци од студии каде што е
евалуирано влијанието на ЖК врз фармакокинетиката на иматиниб е утврдено дека истата
може значително да биде променета и да се намали биорасположливоста на иматиниб
дури за 30% до 40%. Здравствените работници треба да вложат напор за поголема
информираност и едукација на пациентите и зголемување на свесноста за потенцијалните
интеракции коишто може да се појават помеѓу хербалните производи и антиканцерните
лекови. Ова е неопходно за да можните интеракции меѓу лековите не го влошат
терапевтскиот исход.