Содржина на јод во сол

Целта на ова истражување беше определување на јодираноста на солта и содржината на јод во готови производи, во согласност со регулативата на Република Северна Македонија. Во согласност со Правилникот за квалитетот на прехранбена сол (Службен весник бр. 65/99), минимална дозволена јодираност е 20 mg јод/кg сол. Законот за стандардизација (Службен весник бр. 23/95) ја дава правната основа за донесување на овој правилник. Мерењата на 6 случајни примероци на сол се движат во граници: 16.12-25.11 (mg/kg). Два примерока беа под минималната граница (16.12 и 19.82 mg/kg), додека останатите се во согласност со нормативата. Во 6 примероци на готов производ, содржината на јод беше многу пониска, во опсег од 0.26 до 0.68 mg/kg, што е резултат на термичката обработка и концентрацијата на солта во готовиот производ. За готовите производи не постои посебен правилник кој директно ја регулира јодираноста на солта или максималната количина на јод. Се смета дека солта која се користи треба да ги исполнува барањата за јодираност пропишани во правилникот 65/99. Препорачливо е редовно да се следи додаваната количина на сол во готовите производи и да се спроведуваат лабораториски контроли. Овој пристап обезбедува усогласеност со националните стандарди и ја гарантира безбедноста и нутритивната вредност на прехранбените производи.
Клучни зборови: јодираност, стандардизација.