Мукокела на максиларен синус: приказ на случај

Вовед: Мукокелата на максиларниот синус е редок ентитет кој сочинува 2-10% од сите мукоцели и се развива поради опструкција на изводниот канал на максиларниот синус поради хроничен синузитис, полипи, коскени тумори, траума или по оперативен зафат. Мукокелата на максиларниот синус е бенигна, епителизирана цистична лезија која може да биде долго време асимптоматска, но со тек на време доведува до симптоми на болка или притисок на образот, оток, еднострана назална опструкција и др.
Цел: Цел на овој приказ на случај е да се претстави мукокела на максиларниот синус кај 27-годишна жена со присутен дифузен оток на десната страна на лицето.
Приказ на случај: Пациентката даде анамнестички податок за појава на оток кој првично бил мал и постепено напредувал до сегашната големина и кој перзистирал 6 месеци. При екстраорален клинички преглед, присутен беше дифузен оток на десната страна на лицето. Интраорално, на палпација, отокот беше безболен и со цврста конзистенција. На Панорамската рендген снимка беше забележана голема радиолуцентна лезија во десниот максиларен регион. Вторниот десен молар беше индициран за екстракција. Следуваше екстракција на забот 17 под локална анестезија. Настана колизија со максиларниот синус, се енуклеираше лезијата што се појави за време на тестот за дување на носот. Се направи синус пластика по Wassmund и на тој начин беше постигнато примарно затворање на екстракционата рана.
Резултат: Материјалот беше испратен на хистопатолошка и имунохистохемиска анализа на Институтот за патолошка анатомија со цел поставување на дијагноза која потоа беше потврдена со наодот. Мукоцелите често погрешно се дијагностицирани како цисти или тумори од одонтогено потекло при конвенционалната рендгенска снимка. Доцнењето во поставување на дијагнозата ќе резултираше со компликации поради ширењето на мукокелата кон соседните структури како што се носот и орбитата.
Заклучок: Овој приказ на случај ја потврдува важноста на навремената дијагноза на мукокелата на максиларниот синус и ефикасноста на нејзината хируршка терапија.